مجموعه قصائد حامد زيد - يابلادي كم علا شانش

السلام عليكم صقيقيني وصقيقاتي

كيف الحال عساكم بوخير

اليوم حبيت انزل موضوع جديد جمعت فيه اغلب قصااائد شاعرنا المبدع ( حامد زيــد)

وان شالله ينال علىا استحسانكم

وياريت تعبرون تعبي برد يبرد القلب

غرام أحباب
على ذاك الطريق اللي يسمونه غرام أحباب
وطت رجلي على دربه ولاأدري وش نوى فيني

تبعته لآخر دروبه .. ألين أن القمر قد غاب
تعب قلبي ، ولا تعبت مسافاتٍ توديني

لقيت الليلة الجردا : هدب ظل وسما واعشاب
بعد ذاك الظلام اللي يتوهني عناويني

صدفتك معجبه فيني وياليت..الغرام : اعجاب
وتراك انتي الهنوف اللي هقيتك تستحقيني

عطيتك عشق من قلبي..وسلمت لغلاك رقاب
وغيرك يحترق قلبه ولا يقدر يحاكيني

أنا قبلك صدفت عيون لكن ويش جاب لجاب؟
ترى كل العيون اللي لقتني ما تكفيني

رماني حظي العاثر عليك وجيت لك طلاب
ولا أنتي اللي عشقتيني ولا انتي اللي عتقتيني

تعالي واعتقي ذاك الخفوق المولع المرتاب
مهب لاجلي ، عشان الله يجازيك ويجازيني

تعدي في سما عشقي ولو عشقي خراب أصحاب
وصوني بالهوى نفسك قبل لا انتي تصونيني

وشيليني على متنك : خفوقٍ باريٍ منصاب
ومن فوق الغرام العذب .. شيليني وحطيني

ولا منك هقيتيني شجاع وما يطيق يهاب
أنا لك بالهوى والله مثل ما انتي هقيتيني

أنا ما أمشي ورا غيرك ولو أنه يطق الباب
وترى عيبٍ عليّ أطعن..ولو كثرت سكاكيني

زهودٍ ما يطيق الدم لا داين ولا طلاب
شجاع وعارفٍ نفسي وأظن أنك تعرفيني

غيورٍ ماعرفت أضحك مع الغدر ببّرود أعصاب
أبيع عيوني الثنتين قبل أنك تخونيني

إذا شد الغرام .. اترك خفوقي : بين ناب وناب
لفرقى تكسر ضلوعي .. ولا عشقٍ يوطّيني

أنا رجلٍ ولي غيره .. وإذا شفت الهوى كذاب
تثور بقلبي الفزعه ولا تهدى شياطيني

سؤالك لو يزعزع بي كياني ما قبلت عتاب
اجي لك وأسالك نفس السؤال اللي سألتيني

عن العشق القديم أبواب .. تقفيها كثير أبواب
بعد ذاك الحبيب اللي خدعني وانخدع فيني

أبي عشق تحسب له كل نظرات العيون حساب
وابي قلبٍ علي قلبي ، وابى دينٍ على ديني

وابي نظرة عطا توفي ولا تخلف بدون أسباب
وابي منك قبل لا نتي تصديني .. توديني

وابي دربٍ على العذال صعبٍ ومتعبٍ وغلاب
وابي نفس الطريق الصعب يبعدهم ويدنيني

ترى لو للقلوب عيون ولدموع العيون أهداب
حشى ما تنزل الدمعه لغيرك لو تركتيني

أنا أول من عرف قدرك وأنا توي صغير وشاب
وابي منك ما دام أنك عرفتيني تحبيني

ما دام أني لقيتك في طريق أسمه غرام أحباب
دخيل الله ، وبعد الله دخيلك .. لا تخليني

ما دام أن كل من يحيا على وجه التراب تراب
عسى تنساني الدنيا مادام أنتي ذكرتيني

تزعلين وتقعدين

عافت الشمس المدينة وأعلنت وقت الزوال
رغبةٍ للنوم منها مع عيون الناعسين

أبعدت من يوم شافت بالسما ضيّ الهلال
كنّها كانت تهزّا بالهلال وتستهين

كفكفت صبح التلاقي من ورا روس الجبال
واستخارتني وراحت وابعدت عن كل عين

وانتي أخطيتي خطاها وانعزلتي بالوصال
ولا رحلتي من سكات ولا وعدتيني تجين

عشت عمري بالمحبة في سبيل الاحتمال
وانتي تعيشين عمرك تفرحين وتجرحين

من غرورك في جمالك ما عطيتيني مجال
وأدري إنك تفهميني لو بغيتي تفهمين

كيف أشوف الشمس تشرق بالسما وانت ظلال ؟
ومن يعيش بوسط غارٍ للذياب الجايعين ؟

كنت أحسب الكره زايل والجفا لو طال زال
ولا بديتي بالغرام ولا بقى فيني حنين

أشهد إني ما خطيت ولا نويت الانعزال
وما خدعتك في غرامي لين شفتك تخدعين

اصدقي بالوعد مرة لي ولو فيها سؤال
من عرفتك ما أذكر إنك توعدين وتصدقين

كنت أشوفك من عيونك تأمرين أقوى الرجال
والله إني قبل أعرفك ما هقيتك تخضعين

كنت أشوفك تبعدين وقلت من باب الدلال
وإن بعدتي عن عيوني قلت باكر ترجعين

كنتي أكثر في عيوني من عدد وبل الخيال

وين أنا ما الد وجهي كنت أشوفك تضحكين

وإن بغيت أصد عنك من يمين ومن شمال
ما قوت عيني تلفّت لا شمال ولا يمين

عاشقٍ والعشق بلوى وأشهد إن الحال حال
ولا تركتي رحمة الله ولا عرفتي ترحمين

وأدري إنك في غرامي للأسف نلتي منال
افترقنا في دقايق والسبب لعنة لعين

حبك أشبه في غرامي بالوصال الانفصال
ويلعب الخفاق لعبة كبرياء الخاضعين

بالهوى ماهي غريبة نكبة عيال الحلال
ولاني أول من يصون ولا انتي آخر من يهين

الصداقة في عيون الناس منفى للعدال
وكان ردّت للصراحة كلبونا مذنبين

المحبة شبه زالت والصداقة لاتزال
بس أببقى في عيونك ( حامد ) اللي تعرفين

علّميها يا قصيدة واضربي فيني مثال
عرفيها بالبداوة في طباع الأولين

علّميها كيف نصنع صبرنا والاحتمال
علّميها كيف نفلح بالعمل دنيا ودين
علّميها في سوالف حلّنا والارتحال

علّميها كيف نظهر جورنا للجايرين
علّميها يا دقايق ، علّميها يا ليال

علّميها يا عصور وعلّميها يا سنين
إن عشقنا ما بغينا غير عشقٍ بالحلال

وإن نوينا ما لفينا كود ناس طيبين
كاملينٍ في عطانا بس لله الكمال

والرجل فينا غرامه لو يعين ويستعين
ابدويٍ ما يقوده للردّى شد الحبال

يعسف اليدّ الشحيحة للعطا حتى تلين
همنا فعل الرجولة رمزنا لبس العقال

وانتي المكياج كله صار في وجهك سجين
عندك المكياج موضة تحسبين إنه جمال
صار همك في حياتك تكشخين وتطلعين

والا أنا قلبي بقى لي بالمحبة راس مال
والله اللي مبتليني بالهوى والله يعين

إن بغيت أعشق أبالقى كثر حبّات الرمال
لكن انتي لو بغيتي صعب مثلي تعشقين

قلت لك كل الصراحة وأختم أطراف الجدال
وإن زعلتي من كلامي تزعلين وتقعدين

الأم

قصيدتي زاد بعيوني جمالها

واخذت أنقي بالمعاني جزالها

واكتب معانيها من الشوق والغلا

لأمي وأنا اصغر شاعر ٍمن عيالها

كتبتها في غربتي يوم رحلتي

لما طرالي بالسفر ماطرالها

امي وانا بوصف لها زود حبها

وان ماحكيت لها قصيدي حكالها

امي لها بالقلب والجوف منزله

مكانة ماكل محبوب نالها

اقرب من ظلالي وانا وسط غربتي

وانا تراي اقرب لها من ظلالها

ماشافت اعيوني من الناس غيرها

ولا خلق رب الخلايق مثالها

اغلا بشر في جملة الناس كلهم

واكرم من ايدين المزون وهمالها

اتبع رضاها ورتجي زود قربها

واللي طلبته من حياتي وصالها

الصدق مرساها والاشواق بحرها

والعطف واحساس الغلا راس مالها

اهيم فيها وابتسم يوم قلبها

يسأل وانا قلبي يجاوب سؤالها

وان اطلبتني شي فزيت مندفع

اموت أنا واحمل تعبها بدالها

واصبر على الدنيا والاحزان والتعب

واحمل على متني فطاحل جبالها

واسهر اعذب راحة القلب بالشقا

واعيش اعاني بس يرتاح بالها

تربية ابوي اللي على الطيب بذكرة

اللي وهبني الحياه ومجالها

نور لي ادروبي وانا طفل مبتدي

حتى تركني واحد من رجالها

الوالدين اولى بالاحسان لجلهم

وأولى بتكريم النفوس وعدلها

اقولها وانا على الله متكل

والله عليم بقدرتي واحتمالها

ياكلمة اغلى من الناس كلهم

ياشمس بقلبي بعيد زوالها

يافرحة تملي لي الكون باكمله

ياشجرة تكبر ويكبر ظلالها

تضحك لي الدنيا ليا شفت زولها

مثل السما تزها بطلة هلالها

والبعد عنها ياهل العرف ماقدره

لاشك ناري زايدة بشتعالها

ماعيش ببلاد ولاهيب بأرضاها

ولابي عيوني كان ماهي قبالها

أرض ٍ تدوس امي بالاقدام رملها

اموت فيها واندفن في رمالها

الــريـــم

واعيني اللي كل ماذعـذع مـن الغربـي هبـوب
..........يحلا لهـا لـون الغـروب اللـي يـذوب قبالهـا

ويا ويل حالي كل ما يحـلا لهـا لـون الغـروب
..........تطـري لـي الريـم اللعـوب وسالفـة ترحالهـا

وياجرّ قلبـي كـل مـل تطـري الريـم اللعـوب
..........حرّمت أمد ايدي على حاجة وأنا مـا اقـوى لهـا

من سافرت ريم الغلا صدّيت عـن كـل الـدروب
..........ماهـو قصـور بالعـذارى, بـس ذيـك لحالهـا

من فارقتني ما خطف قلبي مـن الحـور محبـوب
............ولا لقيـت الجـادل اللـي تستحـق أحيـا لـهـا

لان القلوب إن ما وفت لأحبابهـا ماهـي قلـوب
..........والعشرة اللـي ماتـرد الـروح مـا نسعـى لهـا

أما الوفاء الل يستر الرجّـال مـن كـل العيـوب
..........والا الجفاء اللي يستر عيوب العـرب ف رجالهـا

مـا أقسـى مــن فــراق أهــل الجـنـوب
..........ويلي على اللي كـل مـا تزعـل تشـد رحالهـا

اللي مذيّرها العتب.. لا شبّـت بصـدري شبـوب
...........عيّيـت أراضيهـا وهـي عيّـت تطـول بالـهـا

كانت معي مثل النصيب يحدّني مـن كـل صـوب
...........كانت دروبـي مـن متاهـات الضلـل.. لظلالهـا

كانت هروبي لا شعـرت إنـي بحاجـة للهـروب
...........كانت سماي اللي ليا ضاقـت علـيّ ألجـا.. لهـا

ليه اتحداني وأنـا فـي كـل الأحـوال مغلـوب ؟
...........ليـه حرمتنـي مـن قهـر عـذالـي وعذالـهـا

ليـه اتجاهلنـي وأنـا مانـي جبـان ولا كـذوب
...........ليه ارخصـت دمعـي وأنـا مـا بكيـت إلا لهـا

ما ترحم اللي له سنه كنّه علـى النـار محطـوب
...........مـا هزهـا دمـع الفقيـد اللـي بكتـه أطلالهـا

ما خافت تهدْم السنين اللي بنتنـا طـوب طـوب
...........ما فكـرت تشفـق علـى حالـي وترحـم حالهـا

قولوا لها لـو مـا تـذوب أنـا بخليهـا تـذوب
...........قولوا لها لو ما عنـت لـي مستعـد اعنـا لهـا

اليا ادمحت لي هالخطا بدمـح لهـا كـل الذنـوب
...........وإن جابت الحسنة معـي تبشـر بعشـر أمثالهـا

افرش لها صدري وطن واجمع من ضلوعي شعوب
..............وارقـى لهـا مكانـة محـد قـدر يرقـى لـهـا

إن كانّي مخطي فأنـا مانـي خلـيّ مـن العيـوب
...........الذنـب يغفـر والبشـر تجـزا بقـدر أعمالهـا

البعد قاسي والفـراق يضيّـق الصـدر الرحـوب
...........وأنــا تعـبـت أدور الحيـلـه وارد احتالـهـا

قولوا لها ترجع ترى ماني على البعـد مغصـوب
...........وإلا تـرى نـذرٍ علـيّ أنـه مهـوب أشوالهـا

أمـا تجنّـب هالهبـال وتتـرك البعـد وتـتـوب
..........والا بتبشـر بالهبـال اللـي مـا هـوب هبالهـا

كافي زعل ترى الظروف مقفّلة مـن كـل صـوب
..........وأنا حملـت مـن الهمـوم أنواعهـا وأشكالهـا

يكفيني أني كل ما هبـت علـى صـدري هبـوب
...........تحـنّ عينـي للجـنـوب وتلتـفـت بلحالـهـا

والمشكلة أني كـل مـا حنّـت عيونـي للجنـوب
...........تطـري لـي الريـم اللعـوب وسالفـة ترحالهـا

وعز الله إني كل ما تطـري لـي الريـم اللعـوب
............حرمت أمد ايدي علـى حاجـة مـا أقـوى لهـا

ادلعها و اولعها

بعـد ماقابلتنـي عاتبـوهـا
على شوف الحبايب حاسبوها

خذوها وأبعدوها غصب عني
وعن وجهة طريقي جنّبوهـا

وشالوها عن عيوني غصيبه
عواذل وأغصبوني وأغصبوها

خذوها من يديني شوف عيني
وعن عيني تعدّوا وأحجبوهـا

كلام وصدّقوا بالبنـت كذبـه
وهم اللي مـن أول كذّبوهـا

وهم وشدخلهم في مال بيّـن
لبوهـا والخلايـق طالبوهـا

وفيّـه لاتخـون ولاتعـانـد
جسوره والمواعيد أرعبوهـا

مـلاكٍ كاملـه والكامـل الله
ولكـن العـواذل عذربـوهـا

وهي كلما دعتني تشتكي لـي
عن اللي سالفتنـا سرّبوهـا

تخاف وتلتفت مع كـل كلمـه
تظـن أن العـواذل راقبوهـا

تلفّت من عقب ماهي جريئـه
شجاعـه ماتهـاب وهيّبوهـا

وأهدّيها وأنـا حايـر وثايـر
مصيبـه ياعـذابٍ عذبوهـا

وهم كلما خذوها عن طريقـي
تراهم صوب قلبـي قرّبوهـا

وأنا ماتعّبـت قلبـي خيانـه
خيانـه رتّبوهـا وأحسبوهـا

ولا يعجـز خفوقـي لايقابـل
جفا من حاربـوه وحاربوهـا

وأنا لي عزّة ٍ تفرض عليّـه
أخاطب بالجفا من خاطبوهـا

وأكسر لوحة الماضي وأزيلـه
وأخرّبهـا مثـل ماخرّبوهـا

وأذوّقهم نـدم ماصـار فيهـا
وأشرّبهم من اللـي شرّبوهـا

وأدلّعهـا وأولّعهـا بنفسـي
وأشرٌّقهـا بعـد ماغرّبوهـا

وأعوّضها عن اللي راح كلـه
وعن ذيـك الليالـي كلّبوهـا

غلاها بالحشـى لازال ثابـت
ولو حتـى بغيـري حبّبوهـا

وغلاي بقلبها مـرّ وتعـدى
غلاهـا لأمهـا ولا لأبـوهـا

التمثال

عفا الله عن خطا غدر الخناجر والضلوع ابطال
باسامح واتركك تحت الظلام الحالك لحالك

دخيلك وفر دموعك ترى هدر الدموع اذلال
وترى مافيه احد يصبر مثل صبري بغربالك

انا عيب علي انقض كلامي والرجال افعال
واذا قلت اقطع حبالك تراني بقطع حبالك

عشان اكسب هدب عيني تجرعت العذاب اشكال
وليتك تراف بحالي علشان اراف بحالك

مسوي في حياتي شي مايذكر ولا ينقال
حتى العدو واهو العدو ما يعمل اعمالك

تمسيني على الهم وتصبحني على الغربال
تقلطني فناجيلك وتقصر عني دلالك

تحملت التعب لاجلك وانا حملي يهد جبال
رحلت من العذاب وما وقفت الا على جالك

علامك كلما اجيك متواضع جيتني تختال
معاك اليا متى باصبر وصبري معك يحلى لك

مثل ما اقبلت لعيونك لزوم تلدلي باقبال
ومثل ما قد حشمتك حس واحشم قلبي اشوالك

انا محد بجابرني اساير معك هالمنوال
ترى ماني تبيع لك ولاني اصغر عيالك

انا حبيت اعشقك نبض ومشاعر ما اعشقك تمثال
انا جيت اسكنك واحياك وابقى فيك وابقى لك

انا جيت اب ظمى عاشق تعب يطرد سراب اللال
انا جيت استفز رضاك من فرقاك والجا لك

انا ما همت بك عاقل انا كنت اعشقك بخبال
انا ما كنت احبك حي انا كنت اعشقك هالك

تخيل من كثر ما خفت تلقى للزعل مدخال
اخاف اخطي على طيفك وادوس برجلي ظلالك

تبعتك والعرب تتبع رعود البارق الهمال
وانا شفت المطر يتبعك في حلك وترحالك

كأن الي خلق حسنك خلقني مع جسدك ظلال
وصرت اقرب جسد يمشي معك باقفاك واقبالك

ابي قلبك يحس انه فقد بمحبته رجال
ملكته من هدب عين وخسرت ارضاه باهمالك

صحيح ان الفراق اقسى ولكن الوصال محال
وانا صعب على ارضي غرورك واضعف قبالك

بعد ما حققت عيني فبعدك للرقاد امال
اعود للسهر.. ياخوي فال الله ولا فالك

ببدل نظرتك فيني واجي لك كل يوم بحال
باكون اقرب من ثيابك عليك ولا اتهيالك

بالمك وانثرك واجمعك وارجع انثرك باهمال
باخونك وازعلك وارضيك وازعل منك وارضى لك

ابرسم بالثرى وجهك وابدفن صورتك برمال
ابشكي للعرب فرقاك واضحك عند عذالك

ابهديك الوصال فراق واهديك الفراق وصال
باسوي مثل ما اشوفك تسوي وافعل افعالك

عشان تعرف من فينا الزعول ومن وسيع البال
ابيك تذوق فنجالي وانا باذوق فنجالك

نصيحه واحتفظ فيها قصر معك الزمن او طال
ابي تسمع كلامي زين وتحطه على بالك

اذا حبك هبال اطفال لك عندي هبال اطفال
ولا وابشر بعد بهبال حب ماهو بهبالك

واذا قصدك تهين اسمي عشان تشمت العذال
ترى لا انت ولا غيرك ولا عشره من اشكالك

أربع خنااااااجر

مشكله لا جات حاجتك بيديـن البخيـل
مايفكـك ليـن تدفـع كثـر مايدفـعـه

ومشكله لا صرت مطعون بكفوف الدخيل
في ظهرك اربع خناجر وبالصدر اربعـه

ومشكله لا ضاق بالوقت رجـالً ثقيـل
يطلـب احبابـه وعيـا زمانـه ينفعـه

ليت ربي مايحاسب خليـلً مـن خليـل
دام مال الحـظ فزعـه وللوجـه اقنعـه

ودام مال العذل تالـي ومابالحيـل حيـل
الغـلا سمـاً نذوقـه ومـرً نجـرعـه

نحتري فيه القا والحصيل هو الحصيـل
مثـل حلمـاً ماتحقـق وعيـت اقطعـه

كني اللي حط بشفاه من جمـر المليـل
لا قـدر يرميـه للنـاس وزرا يبلـعـه

والظروف اللي حدتني لنيـران وفتيـل
عرضت دمع المحاجـر لشـيً يجزعـه

والمدامـع بالغـلا لا تحـال ولا تحيـل
والمشاكل كـل ماجـات جـات مجمعـه

اعذلوني عن هوى النفس وعيوني تخيل
في حبيـب ٍ ماتركتـه ولازلـت اتبعـه

مغرم في حب مثله ولا ارضى له بديـل
عيني تشوفه وقلبـي يجـوع ويشبعـه

ذاك كل مازان بالـي وطالعـت النخيـل
ماذكـرت الا ثباتـه بوقـت الزعزعـه

ماهو الاقطعة مـن حشـا قلبـاً عليـل
وماني الا قطعـة منـه مخلـوقً معـه

لا جميل شفت قبلـه ولا بعـده جميـل
العذارا رهن رمشه وانا رهـن اصبعـه

والله انه لو طلبني اطلـوع المستحيـل
لا اطلعه منـي منـاك يعنـي لا اطلعـه

ماعلي مـن الملامـه وهـرج الهبيـل
مشجع الرجال لا ثـار غيـره مشجعـه

في عيون اللي عشقني ولا جاني هزيـل
الله اللي حط عشقـه بقلبـي وزرعـه

لو سكت ينطق له الصم والدنيـا تسيـل
وان حكى لو يمشي المزن ياقف يسمعه

سلسبيل من شفاتـه يخالـط سلسبيـل
معمعه بسكات واحـلا سكـات بمعمعـه

ماهقيت ان اكثر الليل يمـرح بالجديـل
لين شفته شوف عينـي بكفـه يرفعـه

وان حيت ومابقالي معـه ياكـود ليـل
لا اسهره بأول غروبه وموت بمطلعـه

والله ان العشق جمره وطاحت بالشليـل
وان حصل ماطاعك الوقت بحبابك طعـه

من هو اللي علم عداي نكران الجميـل
ومن هو اللي خان خلي وحـاول يقنعـه

كل عاذل ردني عنك يالطـرف الكحيـل
ياعسى الله يقلعـه ياعسـى الله يقلعـه

يامعرض قلب الاحباب للـدرب الطويـل
السعه لا بـارك الله بالضيـق السعـه

والله ان الوقت قاسي وانا مانـي ذليـل
واشهد ان الرجل مرات ظنـه يخدعـه

وانتم اتعذلون خفـاق بعيـون العديـل
مارحمتم نـار جرحـه وحيـرة مدمعـه

والسوالف ليلها ليـل والحايـل يحيـل
والمشاكـل مشكلـه بمشكلـه متجمعـه

مشكله لا خانك الوقت بالحمـل الثقيـل
لو زرعت الزرع هوج العواصف

ومشكله لاصار عاذلـك مايبـرد غليـل
لا تـرده طيـب كلمـه ولحـدً يمنعـه

ومشكله لا صرت مطعون بكفوف الدخيل
في ظهرك اربع خناجر وبالصدر اربعـه

بوقـت مـن البطا،وبليـل تتـراقـص شياطيـنـه
بعد شفت الضيا ينـزع مـن ثيـاب المسـا ثلثيـن

تحايلـت المنـام اللـي مـثـل بيـتـك تمريـنـه
وانا اللي من تفارقنا وأنـا ماغمضـت لـي عيـن

غريبـة كـل حلـم يـمـر بـرقـادي تزوريـنـه
والاغرب كيف أحلم الحلم،وارجع واحلمـه بعديـن؟

قبـل يومين،شفتـك بالمنام..وقمـت مـن حينـه
ونمت أمس،ورجع نفس المنام اللـي قبـل يوميـن

أنا اللي قبـل اسافـر شلـت قلبـي مـن شرايينـه
تركته فـي يـدك مثـل الأمانـه ،واحفظيهـا زيـن

تـرى حفـظ الأمانـه دين..مجـبـورة ترديـنـه
أجل ، مافيه أحد كد قال لك(حفـظ الأمانـة ديـن)؟

مـرد المقفـي بيلفـي.. ويستـوفـي ،وتوفيـنـه
بعـد ليلـه ،ثلاثه،أربعه،عشره،شهـر، شهـريـن

إذا انتـي ،ماانتـي بقـد الكـلام اللـي تقوليـنـه
حرام..استامنك حاجـة،وإذا جيـت اطلبـك تنسيـن

تخونين،وتبيـن أرضى.!وأحـد يرضـى تخونينـه
أنا لاجيـت أخونـك، مـع حبيبـة ثانيه،ترضيـن.؟

من أول مارجعت من السفـر ماشفـت لـك بينـه؟
وأنا اللي كنت أحسبك قبل ادوس ارض المطار..تجين

تكونين أنتي أول شخـص عينـي تحتضـن عينـه
وكنـت أتخيلـك مـن زود فرحـة رجعتي..تبكيـن

وأشـوف بدمعتـك حكيك..وأعرفـه قبـل تحكينـه
واجيب أحلى مـن اللـي بتحكينه،وأتركـك تحكيـن

تقولين:الـوطـن نـور..وأقـول بنورمضـويـنـه
تقولـي لي:غديـت أحلى،وأقول:عيونـك الحلويـن

كــلام نــام بشفاهك..وخفـتـي لاتصحـيـنـه
ذخرتيـه لغـرام للـي ينام...ويـتـرك تصحـيـن

تغانمـتـي غيابي..لـيـن رجحـتـي موازيـنـه
تعلم مـن يـدك لمـس الكفـوف وعلمـك تجفيـن

وليتـك لاقـيـه بــه شي..فيـنـي ماتلاقيـنـه
مهـو بغرور..لكـن خابـرك مالـك أمـل تلقـيـن

تغافلـك بغـلا..والإ الحـلا مهـو بمـن زيـنـه
تزينه الصور ..بس الصحيح ابـن الحـلال زويـن

وأنـا مانـي بنقـاص عنـه يـوم أنـك تبديـنـه
نصيبي..هو نصيبي لـو يسددهـا مـن الصوبيـن

قنـوع بمظهـري ،والـسـم مايـذبـح ثعابيـنـه
على قول المثـل مانـي حلو..لكنـي مانـي شيـن

إذا أهـداك الزهـر مره،فأنـا اهديتـك بساتيـنـه
وإذا ألهاك بفرح ليلـه، فانـا تهـت لبكـاك سنيـن

وإذا استضعفـتـك أملاكه...وشتـتـك ملاييـنـه
أنا حتـى فتـات الخبـزة أقسمهـا معـك نصيـن

طموحـي ،بـس أجـي وأظفـر بشـي تستحقينـه
تدينـتـه ،تسلفته،سرقـتـه ،مومـهـم منـيـن؟

كأنـي مـن كثـر ماارضـى بكـل اللـي تمنيـنـه
لـو انـك تطلبيـن الله ..يعنينـي، بقـول آمـيـن

أنا ماالعب علـى الحبلين،وقـت الطيـش وسنينـه
تبين الحين يوم أني كبرت العـب علـى الحبليـن؟

ترى عنـد البـدو بالـذات عيـب اللـي تسوينـه
حـلاتـك لاعشقتي..تعشقيـنـي لـيـوم الـديـن

غـرامٍ نسكـن ضلوعه..حشيمـه مـن مجانيـنـه
جفا،يجمـع معزتنا...ولاعـشـق يــذل أثنـيـن

كـثـار الـلـي تحـدونـي وقالـولـي :تحبيـنـه
امانـه ...لاتخلينـي صغـيـر بعينـهـم تكفـيـن

لانــي كـــل ماقالوا(تخون)..اقول:مسكـيـنـه
عليـك الله وأمانه..علميهـم منـهـو المسكـيـن

أنـا خايـف لياطـاح الجمـل تكـثـر سكاكيـنـه
وأنـا ماعـاد بضلوعـي مكـان لطعنـة السكيـن

مثـل ماقالواالمكتـوب واضـح مــن عناويـنـه
لو ارحل منك للغربه بسافـر مـن ظلامـك ويـن؟

كفايه..كـل حـلـم يـمـر بـرقـادي تزوريـنـه
كفاية..مـن تفارقنا..وأنـا ماغمضـت لـي عيـن

قبل يوميـن شفتـك بالمنـام وقمـت مـن حينـه
ونمت أمس،ورجع نفس المنام اللـي قبـل يوميـن

المبزرة

منـك العـذر وعـلـي المـعـذرة
لاتحسب حساب هجـر ولا هجيـر

كـل ذنـب بتذنـبـه بستغـفـره
واحـد مايعـذرك مافـيـه خـيـر

دور بصـدري وطـن واستعمـره
عندك مـن الضلـع الأول للأخيـر

عيش فينـي ودمـر اللـي تدمـره
واعتذر لي واعتبـر سـرك فبيـر

لاتبشـرنـي بـجـرح وتـذخـره
لاتعشمنـي بـحـزن وتستخـيـر

ولاتنومـنـي بلـيـل وتسـهـره
ولاتنـام الا ونـا جفنـي سهـيـر

خلنـي مثـل النـجـوم مبعـثـره
عيش فينـي لاشهيـق ولا زفيـر

لاتقـول العفـو عنـد المـقـدرة
خل قلبك صلب وحسابـك عسيـر

المسامـح والـزعـل للمـبـزره
والا أنا لانـي زعـول ولا صغيـر

ودي أدري كيـف للحـزن أثمـره
ودي أقطف مـن قساوتـك العبيـر

ودي أجفل مـن فراقـك وأحـذره
ودي أعرف لو فقدتك وش يصيـر

لو تقدر خاطـري صـدق أكسـره
لـو صحيـح تحبنـي لاتستشيـر

أزرع بقلبـي سـبـب يستنـفـره
أثبت أنك غير وأن النـاس غيـر

شاعـرك ماكـل بنـت تجـرجـره
حارت بـه عقـول نـاس ماتحيـر

النسـاء ماحركـن فيـه اشـعـره
ثار عشـق ومالقـى شـي يثيـر

أن سكـت كـن الوقـار بمنـبـره
وأن تكلـم زمهريـر بزمهـريـر

مايحضـر الا القلـوب مجمـهـره
ومايغيـب الا وعشـاقـه كثـيـر

أن هجرتـه تستـقـر بمحـجـره
وأن تبعت رضـاه ماعينـت خيـر

اسكنـه لكـن بـعـد ماتهـجـره
ابتسم لـه بـس لاشفتـه كسيـر

حـن لكـن حـن لاجبـت اخبـره
حـب لكـن خـل حبـك بالأخيـر

لو عطيته وجهك أعطـاك اظهـره
صد عنه ويتبعـك مثـل الضريـر

لاتـحـاول تكسـبـه ماتخـسـره
صير ثلج يصير لك مثـل السعيـر

ماتميـل الا الغصـون المثـمـره
ومايسيل من الجـروح الا الغزيـر

من قبـل لاتنقهـر منهـىأقهـره
قبـل لايستحقـرك خلـك حقـيـر

استفزه،شتـتـه، فــج انـحـره
اعشق،أكره،عاتب،أشره،حن،غيـر

أنثـره ،لملمـه ، لملمـه ، أنثـره
صد ،كابر، طير لـو تقـدر تطيـر

مـن متـى ونـا تحرالـي مــره
تثبت أنـي لاوقعـت أوقـع كبيـر

أبك أنا مقطوع من غصن اشجـره
لاصديـق ولارفيـق ولا عشـيـر

ابـدوي شيـب الصبـر اشـعـره
ماعرف ريش النعـام ولا الحريـر

أن غفـا كـن السحـاب يـدثـره
وان صحا يفرش من الرمضا حصير

ماخـذ مـن قسـوة البيـد أكثـره
ومن شموخ البدو شـر مستطيـر

جنتـه صحـراه والشـوك أزهـره
والسـراب بنظرتـه مثـل الغديـر

أن فـزع يامشجـعـه يامظـفـره
من خلـق الله وهـو قـرم وفقيـر

كـان ماتقـدره قـول ماتـقـدره
صير غالـي صـدق ولاا لاتصيـر

الغـلا اللـي ماتزعزعـه اهجـره
كـان قلبـك لايجـار ولا يجـيـر

شوف لك واحـد بليـد استحقـره
واجد اللي يعشقـون بـلا ضميـر

بس أنا لو جبـت لـي ميـة مـره
ماتحـرك فـي شعـره لـو تطيـر

لو....ولو..ولو

أسمحيلي يا الحبيبه مابقـى فينـي سعـه
والصراحه طبع فيني هي حقيقة مو خيـال

الرجوله من صفاتي والـردي مـا نتبعـه
والحقيقة ما انتظرتك والحكـي لازم يقـال

ضيق الخاطر معاني فـي خيالـي بطبعـه
مع هنوفن صادفتني في مسافاتـن طـوال

أبعدت عني وراحت فـي طريـق المنفعـه
مع عذولن كان ضـدي حبهـا حـب ودلال

لاتظنينـي بغيتـك لـو تركتينـي مـعـه
من تركني ما بغيته وموقفي موقف رجـال

لو نسيتينـي بفصلـن بتركـك بالأربعـه
ولو جرحتيني بيومن بجرحك طول الليـال

لو تكوني من ضلوعي ظلع فينـي بشلعـه
ولو تكوني لي حياتي موتها لجلـك حـلال

لو تكوني في عيوني نـور عينـي بمنعـه
ولو تكوني في خيالي صورتن مالك خيـال

ولو تكوني عرق فيني من وريدي بمزعـه
ولو تكوني شمس يومي صرتلك لحظة زوال

لو تناديلي بصوتـك فـي منامـي بسمعـه
وفالحقيقه ما سمعتك لـو تقوليلـي تعـال

من شرى شي بحلاله مـا يفيـده رجعـه
والحقيقه مـا صمدتـي بالعذايـب الثقـال

ما وطيتي من مقامي بإسـم ربـي بأرفعـه
ولو يحن القلب لحظه نحرمه لحظة وصال

قدها و قدود

أنا ربتني الدنيا علـى جـزل العطـا والجـود
ونفسي للوفا والطيـب وفعـل الخيـر جزامـه

وأعارض منهج الهابط وأوافق للصعود صعـود
وأسيّر نفسـي بعقلـي مـدام النفـس هدامـه

ولا تثّر بي البسمة ولا كحـل العيـون السـود
ولا يقوى على قلبي صغير الحسـد وأجسامـه

أردّ الجود بأمثالـه وأقابـل بالجحـود جحـود
وترى لا خير في رجلٍ يوطّـي للـردى هامـه

وعندي مع أهل العِليا مواثيـق وثـلاث عهـود
أوفـي لـه مطاليبـه وأودّه وأرفـع أعلامـه

أعايش مركب الدنيا على متـن القـدر مولـود
أبعرف هو صحيح إنّ القدر بالنـاس دوّامـه ؟

ومن وين الزمن مقبل وإلى وين الليـال تقـود
ومن في هالزمن يقدر يوجّـه خطـوة أقدامـه

ومن له بالزمن غاية ومن عنده هدف منشـود
ومن منّا قدر يعـرف خفايـا مقبـل أيامـه ؟

عرفت إنّ الشقا باقي ، عرفت إنّ الحسد موجود
عرفت إنّ القدر يفرض علينا بأسـوأ أحكامـه

لقينا بالعرب حاسد وشفنـا بالعـرب محسـود
وبه ناسٍ لنا ضامت ، وبـه بالنـاس منظامـه

وينقص بعضنا خـوّه وينقصنـا وفـاء وعـود
مدام الحسـد باقـي وبعـض النـاس نمامـه

ولا ترجى بها الدنيا من ربوعك يجيـك اسنـود
ولا تشره على رجـلٍ عيونـه خانـت أقدامـه

وقابل خطوة بخطوة وجازي بالصـدود صـدود
تناسى غلطة الصاحب عليك بلحظـة اخصامـه

ولا تخطي ترى لصبر الحليم اليا سـلاك حـدود
تروّى واعرف بضرب الحديـد تفكـك لحامـه

تجنب كسرة الخاطر ولو حبل الزعـل مشـدود
تراك بكسرة الخاطـر حكمـت القلـب بعدامـه

ولا تزعل على رجلٍ بذل لـك ولرضـاك جهـود
ولا تامن من الحاسد رضـاه ورفعـة ابهامـه

نبي نصبر على الدنيا قلـوبٍ بالحيـاة زهـود
مدام إنّ البخت عيّـت توّفـق رمعـة سهامـه

وأنا ما قلتها راجي ولا أطلـب بعدهـا مـردود
ولكـن الفتـى ودّه يحقـق جملـة أحـلامـه

وبمشي لآخر الدنيا ولـو كـلّ الأنـام اقعـود
وعن وجه الزمن بكشف حقيقه وأرفـع الثامـه

صحيح إني صغير السن ولكـن قدهـا وقـدود
وأنا عندي مع الدنيـا مواقـف ترفـع الهامـه

طموحي يملي العالـم ولابـه للطمـوح قيـود
مدام إن الأمل طبعي ( عرين وصرت ضرغامه )

خلقنا الله من ترابه ولأحضـان التـراب نعـود
تحت رمل الثرى نبقى تغطـي جسمنـا خامـه

سلفنا ما لحقناهم تحـت قـاع التـراب رقـود
ولا يبقي من الميـت سـوى ذكـراه وعظامـه

ولو طال العمر فاني وترى عمر الفتى محـدود
وكلٍ يطلـب المولـى يبيحـه يحسـن ختامـه

وأنا بلّغـت بلسانـي وربـي والأنـام شهـود
وصحف البيّنة جفّـت وعنهـا رفعـت أقلامـه